Kisha pasur në mend t’i përdorja shembujt nga arti vetëm për të ilustruar pikëpamjen time për raportet midis njohjes dhe informacionit, por disa degëzime të diskutimit meritojnë të trajtohen veçmas.
Pata përmendur dikur, në një temë tjetër, si e kisha kërkuar në Romë kishën San Pietro in Vincoli, për të parë dhe admiruar atje statujën e Moisiut nga Michelangelo – vetëm e vetëm ngaqë pak kohë më parë kisha lexuar një ese të Freud-it për atë statujë. Kishën e gjeta, statujën e pashë, eksperienca më ka mbetur edhe sot e gjallë në mendje, madje në trajta vizuale. Megjithatë, sot kam të drejtë të pyes nëse kënaqësia që ndjeva atëherë ishte kënaqësi intelektuale e dikujt që arrin të bashkërendojë informacionin që ka marrë nga librat me informacionin shqisor; por nuk kishte të bënte me përvetësimin estetik të statujës prej meje.
