Siç lexoj në BalkanWeb, shkrimtari Ismail Kadare i paska dërguar kandidatit për kryebashkiak të Tiranës Basha një letër të hapur, ku e fton të tërhiqet nga gara, për të lehtësuar daljen nga qorrsokaku i kësaj krize të fundit.
Shkruan ndër të tjera Kadareja:
Si politikan dhe si zyrtar ju jeni gjendur kohët e fundit, në qendër të një cikloni, i cili jo vetëm mund t’ia mbyllë rrugën përparimit të kombit shqiptar, por ta kthejë atë shumë vite prapa në histori. S’është nevoja këtu t’ju kujtoj se sa e pandreqshme dhe e pafalshme do të jetë kjo mbrapështi.
Nisur nga kjo, në kushtet e një fitimi ose të një humbjeje fare të paqartë, do t’ju propozoja një gjest , që, sot për sot është i rrallë, gati i përjashtuar nga jeta politike shqiptare : tërheqjen nga kandidimi për kryetar bashkie.
Letra është shumë e mirë, dhe i ka të gjitha gjasat për t’ia arritur qëllimit – zgjidhjen e krizës, duke shmangur poshtërimin e palës humbëse.
Tek e fundit, në një shoqëri patriarkale dhe autoritariste si e jona, e vetmja mënyrë si mund të dilej nga ky ballafaqim ishte nëpërmjet invokimit të një autoriteti suprem.
Më pëlqen edhe që kjo thirrje ka ardhur nga një personalitet që, në thelb, është pjesë e jetës shqiptare, nuk i imponohet asaj nga jashtë, as e lë veten të përdoret nga të shkathëtit me kravata shumëngjyrëshe.
Like this:
Like Loading...
Read Full Post »
